Mikið að gera

Það er búið að vera ansi mikið að gera undanfarið.
Byrjum á nornakvöldi sem ég fór á ásamt yndunum mínum í saumaklúbbnum. Stórskemmtilegt kvöld þar sem voru borðaðar þær bestu pizzur sem ég hef smakkað. Takk Viðar. Þess má geta að hann var eini karlmaðurinn sem fékk að koma þarna nálægt sökum hæfni í pizzugerð. Svo var spáð í bolla og spil og hlegið og drukkið fram á nótt. Alltaf gaman að hitta þessar elskur og ég tala nú ekki um þegar við breytum aðeins út af hefðbundnum saumaklúbbum.

Svo fór ég í starfsmannapartý. Þar vorum við dregin í þoku og sudda að Hellisheiðarvirkjun. Þar fengum við fínar veitingar bæði í föstu og fljótandi fæði. Þar sem þetta var á góðum föstudegi höfðum við nokkrar tekið forskot á sæluna og skellt nokkrum köldum í okkur löngu fyrir brottför. Eftir virkjunarheimsókn var svo endað í fínasta mat í golfskálanum. Heimi tókst reyndar að eyðileggja skemmtunina með einhverjum blammeringum frá fyrrum Amsterdam-ferð, en ég er með áform um hefndir. Bíðið bara Heimir og félagar!!!

Á milli djamma hef ég svo reynt að læra en gengur svakalega hægt. Nú eru reyndar að hellast inn lesefni og verkefni í gríð og erg svo það er betra að fara að taka sig á. Fer svo annað slagið í starfsþjálfun í bæinn. Fylgist grannt með námsráðgjöfum að störfum í kennaraháskólanum og finnst það mjög áhugavert starf.

En í staðinn fyrir að læra á ég eftir að eyða nokkrum kvöldum hjá Leikfélaginu þar sem ég hjálpa þeim við að mála sviðsmynd. En það er bara gaman.

Eins og þið sjáið, brjálað að gera. Tek svo bara langt og gott jólafrí í afslöppun. Ekki svo langt í það, eða hvað??? Annars finnst mér Dagur B. Eggertsson miklu sætari en Villi Vill....

Þegar ég beraði mig fyrir nágrannanum!!!

Þegar maður er heima hjá sér er maður oft frjálslegur í klæðaburði eftir góða baðferð. Oftast fer ég þó gætilega og passa að hafa dregið vandlega fyrir alla glugga svo ég geti striplast að vild. Eftir eina slíka baðferð seint að kvöldi til stökk ég á evuklæðunum einum saman inn í svefnherbergi og sá þá að dregið var frá í öðru barnaherberginu. Ég hrósaði happi yfir fína pallinum fyrir utan herbergið, það gæti nú engin séð þar inn svo auðveldlega fyrir háum skjólveggjunum. Ég hélt áfram að dilla mér þarna við að klára að þurrka mér og finna mér föt, allt í einu fattaði ég að nágrannin á móti var búinn að vera að smíða uppi á þaki hjá sér allt kvöldið....langt fyrir ofan háu skjólveggina mína.

Sól sól skín á mig

Rigningin gerir mig svo leiða. Allt svo dimmt og drungalegt. Þegar ég er orðin rík verður það á framkvæmdalistanum að fara alltaf einu sinni á önn í betra veður í útlöndum. Er samt ekki einu sinni viss um að við komumst eitthvað næsta sumar þar sem til stendur að skipta um eldhúsinnréttingu. Erum reyndar byrjuð að fá tilboð um húsaskipti svo það verður erfitt að hafna góðu tilboði. Ég vil bara sól og blíðu, ætti að eiga heima annars staðar en á Íslandi.