Frábær sumarbústaða helgi í nánd

Hlakka mikið til helgarinnar því nú stefnir í eina bestu helgi haustsins, eða vetrarins miðað við veðrið akkúrat núna. Við stelpurnar erum að fara í bústað í Borgarfirði og svo koma kallarnir til okkar á morgun ef það verður ekki orðið ófært he he.
Við höfum reynt að hafa þetta árlegan viðburð þó það hafi ekki alltaf tekist sökum barneigna í vinahópnum. En þetta er í fyrsta skipti sem okkar elskulegu eiginmenn fá þann heiður að vera boðið seinna kvöldið.
Hlakka alveg óskaplega til...

Mikið hef ég það gott

Ég hef það bara fínt í dag. Vaknaði meira að segja kl. 6:15 og fór í leikfimi. Dugleg. Hver hefði trúað því fyrir nokkrum árum að Kolbrún myndi vakna á morgnana til að fara í leikfimi? Allavega ekki þeir sem þekkja mig frá Laugarvatns-árunum þar sem íþróttir og morgunleikfimi voru ekki mín sterkasta hlið. Var frekar svona Anti- eitthvað í íþróttum og gat aldrei neitt.

Ætla að vinna til 14:08 og bruna svo í bæinn. Reyndar held ég að ég vinni ekki mikið lengur en til 13:50 þar sem kennslunni lýkur þá og næsta víst að kaffistofan verði mín stoppistöð til vinnuloka.

Hafði það líka afar fínt um helgina. Skruppum í bústað á laugardag til Halla og hittum líka sjaldséðan hrafn. Sá hrafn heitir víst Þórir og er frændi minn. Gaman að hitta hann og Elínu Köru dóttur hans. Ræddum meðal annars um að verða rík og kaupa húsið hennar ömmu á Tálknafirði. Ekki slæm hugmynd.

Sunnudagurinn var svo bara rólegur. Svo rólegur að ég sofnaði yfir miðjan daginn eins og ungabarn og svaf vært. Hélt svo dýrindis matarboð um kvöldið.

Hlakka mikið til næstu helgi, þá verður sko hellt í sig.

Bestu kveðjur frá Hveró

Og nú á ég heimabíó

Svona af því að ég var að tala um hvað ég horfi mikið á sjónvarpið þá verð ég auðvitað að monta mig af því að nú er ég orðin óformlegur eigandi heimabíókerfis!! Ég segi óformlegur því auðvitað á VISA allt í þessu ennþá og langt fram á næsta ár.
Daníel þorði nú ekki annað en að spyrja hvort við ættum þetta eða hvort við værum bara með þetta í láni áður en hann fór í skólann í morgunn. Ekki nema von að barnið spyrji. Fengum okkur nebblega 10 daga prufuáskrift að Stöð 2 einhverntímann fyrir löngu og útskírðum fyrir honum að þetta væri bara í nokkra daga þar sem við værum bara með þetta í láni. Hann sá því fyrir sér að hann gæti aðeins horft á DVD myndina sem hann fékk nokkrum sinnum og svo þyrfti að fara að skila góssinu. Við skulum allavega vona að ég standi í skilum við Visa svo það komi ekki til að það þurfi að skila þessu aftur :-)

Sjónvarpið og ég

Horfði í gærkvöldi á íslenska bachelorinn. Fannst ég vera að horfa á hallærislega fyndna þýðingu úr þessum gömlu amerísku, Muhahahaha þetta var svo hallærislegt að ég lá í krampa, ekkert nýtt, engin breyting, bara á íslensku.

Er annars mjög föst í sjónvarpinu þessa dagana. Er samt alltaf af furða mig á þessari agalegu dagskrá á Rúv. Sá í einhverju blaði um daginn að það var verið að auglýsa allar bíómyndir í október. Á meðan Stöð 2 var með um 20 bíómyndir var Rúv með ca. 4. Fannst þetta frekar skrítið og er að velta því fyrir mér hvort þetta sé virkilega svona. Er endalaust hægt að láta okkur borga fyrir Leiðarljós og Spaugstofuna? Er ekki komið nóg af þessu spaugi. Fíla reyndar einn þátt alveg í botn. Little Britain, með gaurunum tveimur eru alveg óborganlegir.

Kvöldin mín fara semsagt í lítið annað en sjónvarpsgláp hvort sem það eru skemmtilegir eða leiðinlegir þættir. Finnst bara ógeðslega gott að liggja í sófanum og þurfa ekkert að hugsa.

Las annars um daginn að íslenska orðið kátur þýðir graður á færeysku, finnst það fyndið! Yndisleg þessi færeyska.

Segjum nei við sameiningu!!

Kaus í sameiningar kosningum í dag um að ég vil ekki sameiningu. Held að sameining yrði aðeins til vandræða þar sem allt myndi snúast um að Selfoss yrði miðpunktur bæjarfélaganna á Suðurlandi og allt ætti að verða svo fínt og flott þar á meðan ekkert gerist hjá hinum. Samanber skrítnar hugmyndir um nýjan miðbæ á Selfossi sem er ekkert nema snobbið.

Annars lítið að frétta, er enn að reyna að hemja þessa brjálæðinga mína í skólanum en gengur eitthvað hægt. Er líka enn dugleg að fara í ræktina en er samt enn alltaf svo þreytt. Er farin að hallast að því að þetta séu streitu einkenni úr vinnunni. Já þessi börn eru sko ekkert grín.

Bíð spennt eftir vetrarfríi í lok mánaðarins.