Best að láta vita af sér

Takk fyrir allar góðu kveðjurnar á þriðjudaginn var. Eins og þið vitið þá yngist ég alltaf um eitt ár hér eftir.

Átti erfiða skóla-helgi síðustu helgi. Hlakka því mikið til að geta sofið út á laugardag. Er að rembast við að koma mér áfram í verkefnum. Svolítið erfitt þar sem flest verkefnin ganga út á að vinna með atvinnulausa einstaklinga og erfitt að finna tíma til að hitta svoleiðis fólk. Vinn samt best undir álagi svo þetta er allt að koma.

Tók út hjólið um daginn og ætlaði að vera svooo dugleg. Eftir nokkra metra var ég kominn með andarteppu og löðrandi sveitt hamaðist ég við að útiloka þreytuverkina í fótunum. Skildi ekkert í hvað þetta var erfitt. Sat kófsveitt og illa lyktandi á fundi. Hamaðist svo aftur heim þegar ég uppgvötaði að helv. hjólið er fast í þriðja gír. Lá í sófanum það sem eftir var dagsins og hef ekki hreyft hjólið síðan.

Hræðileg hræðsla

Ég fæ alltaf mjög mikla ónotatilfinningu þegar ég heyri um alvarleg bílslys. Heyri oft í brjáluðum sírenum þegar slys hafa orðið í nágrenninu. Í hádeginu heyrði ég sírenuvæl. Og nú er enn eitt banaslysið á Suðurlandsvegi. Hræðilegt. Við viljum tvöföldun og það strax.

Lenti í hasar í vinnunni í gær. Var orðin þreytt á ólátum nokkurra drengja og ætlaði að fá skólastjórann í lið með mér til að lesa þeim pistilinn. Gerði ekki meira gagn en svo að þeir urðu svo hræddir að annar hljóp og læsti sig inni á klósetti og hinn sá ég endasendast út um gluggann á skólastofunni. Hríðargaddur og bylur utandyra. Sokkalaus hljóp hann til mömmu sem kom með hann aftur í skólann. Þetta endaði þó vel og við ræddum saman í rólegheitum án skólastjórans. Hugsa mig tvisvar um áður en ég beiti "nú næ ég í skólastjórann" aðferðinni aftur.

Lifið heil!!

Tapað - fundið

Ég týndi orkunni minni rétt eftir áramótin, getur einhver hjálpað mér að finna hana?? Gæti hafa tapast vegna álags í vinnu og félagslífi. Er þá einhver von um að finna hana aftur?? Á mínu heimili er stundað nám með ZERO lærdómi........nei nú er ég hætt he he he, er að tapa glórunni.

Takk fyrir öll kommentin, gott að sjá að einhver fylgist með :-)

Endalaust mikið að gera og allt virðist skemmtilegra en að læra þessa dagana. Silast hægt áfram í bókunum. Staðnám í næstu viku og verkefnin ekki klár. AAAarrgghhh.
Ætla nú að bretta upp ermarnar. Fer ekki að klikka úr þessu. Of stutt eftir af önninni til þess.

Ekki gleyma morgunmatnum, hann er mikilvægasta máltíð dagsins!!!

Hjá gilli gilli offsenfeffer, katsenellen kofa út við sjó.

Fór á þessa dúndrandi árshátíð um helgina og skemmti mér konunglega. Var sett í skemmtiatriði á síðustu stundu svo ég þurfti nauðsynlega að sturta vel í mig. Var sett í það hlutverk að dansa pervertískan dans við lagið "það var lítið hús...." og ekki nóg með það heldur var ég í hlutverki karlmanns. En þetta heppnaðist bara vel og vakti mikla lukku. Það voru ekki einu sinni allir samstarfsmenn mínir vissir um að þetta hefði verið ég, he he. Verst að ég á engar myndir af þessu atriði til að gleðja ykkur með.

Svo ætla ég að prófa að vera einstæð í nokkra daga. Njörður ákvað að flýja af landi brott og taka út aðstæður í Svíþjóð fyrir sumarfríið. Nei reyndar er hann að fara í vinnuferð til Stokkhólms og kemur við í Köben í leiðinni. Ætla að nota tímann vel og læra óóógeeeðslega mikið. Enginn til að taka af mér fartölvuna á meðan.

Annars finnst mér orðið sorglega lítið um komment hjá mér undanfarið, svo þið megið alveg láta mig vita ef einhver er að lesa þetta bull í mér.

Lifið heil.

Af hinu og þessu

Myndin sem ég setti inn í síðustu færslu vakti greinilega ekki þau viðbrögð sem ég vænti. Bjóst við heljarinnar umræðu um hvað þessir tveir menn væru nú líkir............he he.

En að allt öðru, það hefur margt gerst undanfarna viku. Ég hef t.d:

- hitt undurfagrar meyjar úr ML sem aldrei breytast
- frétt af öðrum ML pæjum sem ætla að fjölga mannkyninu
- spasserað um Kringluna í leit að gullskóm en ekki fundið þá réttu
- dreymt að ég hafi misst af árshátíð og var miður mín
- hugsað um að fara út að skokka en kenni alltaf veðrinu um
- farið á fjarfund og verið mjög gáfuleg
- slegið svo fast í kennaraborðið að mig sveið í hendina
- ekki lært nóg......

Annars er ég sem sagt að fara á árshátíð á laugardaginn og ég ætla rétt að vona að ég sofi hana ekki af mér. Á morgun er höfuðfata og hárkollu dagur í vinnunni og mikil stemmning.
Hér er sko allt fullt af lífi og fjöri!