Frí, frí, frí

Já nú hef ég hamast við það í heila viku að vera í fríi. Er búin að hvíla mig vel og nú veit ég varla hvernig ég á að snúa mér, snýst helst bara í hringi og bora í nefið. Ekkert að frétta af húsnæðismálum en þar sem við erum byrjuð í pallasmíð er ekkert víst að maður tími að fara héðan þegar þessi fíni pallur verður kominn upp.

Daníel er byrjaður á golfnámskeiði og gengur glymrandi vel. Svo er hann að fara að keppa í fótbolta á Borgarnesmóti næstu helgi. Það fer auðvitað öll fjölskyldan með svo þetta verður fínasta útilega.

Fer að setja hér inn eitthvað af myndum í stað skrifta ef við gerum eitthvað skemmtilegt í sumar.

Þar til næst, lifið heil!

Amsterdam...

...er skemmtileg borg. Frábær ferð með frábærri skipulagningu sem lét þetta allt ganga smurt. Við skoðuðum þrjá skóla og urðum margs vísari. Vonandi verður hægt að nýta eitthvað af því næsta haust.
Fór í siglingu um síkin, skoðaði borgina, þ.á.m. Rauða hverfið, fór á Van Gogh safnið, drakk ótæpilega og meikaði það sem Queen of Tálknafjörður. Svo var verslað og drukkið meira. Yndisleg ferð.

Læt hér fylgja með vísu sem einn samferðamaður minn samdi sem segir allt sem segja þarf, þetta má syngja við lagið "Að lífið sé skjálfandi lítið gras":

Að stelast í dálítið stuð og djamm
er í stakasta lagi í Amsterdam.
Þar er iðandi mannlíf og margt að sjá
og mest af því eitthvað sem ekki má.

Mikið lifandis, skelfingar, ósköp er gaman
að vera hér út í Amsterdam.

Lifandi strætin og lindin tær
sem liðast um borgina nær og fjær.
Kanalar fullir af kresnum skríl
þar kvað vera auðvelt að týna bíl.

Mikið lifandis, skelfingar, ósköp er gaman
að vera hér út í Amsterdam.

Í hverfinu rauða er hverg´að sjá
Hvergerðing, nei það er af og frá.
Þar karlarnir vafr´um með veskin sver
og vörurnar geymdar á bakvið gler.

Mikið lifandis, skelfingar, ósköp er gaman
að vera hér út í Amsterdam.
(HE)

Er farin til Amsterdam.
Góðar stundir.

Hætt við!!!

Eftir nánari umhugsun ákváðum við að leyfa fyrirvaranum í kauptilboðinu að taka við. Þorðum ekki að taka áhættuna að eiga tvö hús í einhverja mánuði. Húsið okkar er samt enn í sölu, a.m.k. á meðan hitt er til sölu.

Annars nóg annað að gera. Var í tveggja daga skólaferðalagi með bekknum mínum sem gekk alveg stórvel. Svo eru bara 4 dagar í Holland, ekki leiðinlegt. Sumarfríið á næsta leiti, svo er það Svíþjóð 16. júlí. Nóg að gera.