Allt að gerast

Þá er Njörður orðinn formlega útskrifaður. Það átti sér stað síðasta laugardag og má því hér eftir kalla hann "Meistari Njörður". Ég var reyndar ekki viðstödd þessa skemmtilegu athöfn í Laugardalshöll þar sem var verið að útskrifa um 900 manns. Ég var nefnilega stödd í Borgarnesi að horfa á Daníel keppa í fótbolta. Njörður skrapp bara í bæinn á laugardeginum til að klára dæmið.

Annars gerðist ég svo djörf að panta mér miða til hennar Ágústu helgina 21.-24. júlí. Hlakka mikið til enda búin að ætla að heimsækja hana sl. tvö ár eða svo. Þetta verður því í þriðja sinn á stuttum tíma sem ég fer til Englands, en það er bara gaman því ég hef aldrei komið til Manchester fyrr.

Næsta helgi fer svo í að hugsa um einhverja blessaða Norðmenn sem ég lofaði að taka að mér í gistingu. Maður er orðinn svo mikill Hvergerðingur að við ákváðum að taka þátt í Norrænu vinarbæjamóti. Ég lét eiginlega plata mig út í þetta og held alltaf að ég sé svo sniðug. En núna er ég eiginlega farin kvíða ansi mikið fyrir að hafa eitthvað ókunnug fólk á heimilinu heila helgi og geta svo kannski ekkert talað við það. Það er bara eins gott að þetta sé skemmtilegt fólk.

Svo eigum við nú eftir að fara í a.m.k. eina almennilega útilegu. Vorum að hugsa um að fara inn í Landmannalaugar ef veðrið verður almennilegt, svo ef einhver vill koma með þá er það sjálfsagt.